İnsanın dəyəri, qiyməti yoxdur. Ancaq bəzu məşhurlar öz bədənlərinin ayrı-ayrı hissələrini qiymətləndirmək qərarına gələrək, sevimli əzalarını sığortalayıblar. Qiymətlər ağılasığmaz və əlcatmazdır.
Xatırladaq ki, ilk dəfə olaraq bədən üzvlərinin sığortalanması 1920-ci ildə qeydə alınıb. Amerikalı komik aktyor, səssiz filmlərdə çəkilən Ben Turpin öz gözlərini 25 min dollara sığortalayıb. Bu da təsadüfi deyil. Çünki aktyoru məhşurlaşdıran məhz onun çəp gözləri olub.
Modern.az saytı məşhurların sığorta qiymətlərini təqdim edir.
Bir çox titulları ilə, aktrisa, rejissor, bəstəkar, rəqqasə, modelyer, yazıçı kimi məşhurlaşan, “Pop Kraliçası” ləqəbli Amerika müğənnisi Madonna öz sinəsini 12 milyon dollara sığortalamaq istəsə də sığorta şirkətinin ekspertləri məşhur müğənninin sinəsini 2 milyon dollar məbləğində qiymətləndirərək sığortalayıblar.
Dünyanın ən uğurlu modellərindən biri sayılan, 500-ə yaxın jurnalın üz qabığını bəzəyən, məşhur alman modeli və aktrisası Klaudia Şiffer üzünü 5 milyon dollara sığortalayıb. Çox yəqin ki, bu alman gözəli müqavilə bağladığı sığorta şirkətinə güzəştə gedib. Çünki Forbes jurnalına görə Şifferin dəyəri təxminən 55 milyon dollara yaxındır.
Populyar alman top-modeli, aktrisa və teleaparıcı Haydi Klum öz yaraşıqlı baldırlarını 4 milyon civarında qiymətləndirmək istəsə də buna nail ola bilməyib. Sığorta şirkətinin ekspertləri onun ayaqlarına baxış keçirərkən sol ayağında güclə nəzərəçarpacaq kiçik çapıq aşkar ediblər. Bundan sonra şirkət Haydi Klumun sol ayağını 200 min dollara, sağ ayağını isə 2 milyon dollara sığortalayıblar.
Məşhur kino ulduzu və pop müğənnisi Cennifer Lopes sığortalanmaq məsələsində bütün rekordları sındırıb. O bütövlükdə öz bədənini 1 milyard dollara sığortalayıb. Onun baldırları 400 min dollara, baldırlarından bir az yuxarı arxa hissəsi isə 300 min dollara sığortalanıb. Cennifer Lopesin ehtiyatsız bir oturuşu müqavilə bağladığı sığorta şirkətində hansı qorxu və təşviş yaratdığını təsəvvür etmək çətin deyil.
Avstraliyalı müğənni Kayli Minouq da sığortalanmaq məsələsində Cennifer Lopesin ənənsini davam etdirib. Müğənni beşinci dayaq nöqtəsi saydığı arxa hissəsini 5 milyon dollara sığortalayıb.
Populyar müğənni Merayya Keri də rekordçular sırasındadır. Müğənni öz ayaqlarını 1 milyard dollara sığortalayıb. Bu qiymətdən belə nəticə çıxarmaq olar ki, Merayya Kerinin ayaqları dünyada ən bahalı ayaqlardır.
Məşhur müğənni və aktrisa Rihanna da öz əzalarına laqeyd yanaşmayıb. Rihanna ayaqlarını 1 milyon dollara sığortalayıb.
Amerikalı aktrisa Culiya Roberts öz gülüşünü elə bir qiymətə sığortalayıb ki, təəcüb doğuran bu qiymət insanın gülüşlərini dondura bilər. Nə az, nə çox, aktrisanın gülüşü 30 milyon dollara sığortalanıb.
Azərbaycanlı məşhurlar arasında isə ilk dəfə olaraq “Eurovision-2011” müsabiqəsinin qalibi Nigar Camal 1 milyon 500 min manata üzünü sığortalayıb.
Bütün bunlar maraq doğuran və təəcüb yaradan faktlardır. Amma bir həqiqət də var ki, insanı Allahdan başqa heç kim sığortalaya bilməz. Odur ki, bu məbləğlərə baxıb heç də ürəyinizi sıxmayın.
İlham Cəmiloğlu