Fastfud və şəkərli qidaların tez-tez qəbulu yeniyetmələrin yaddaşına ciddi və uzunmüddətli zərər verə bilər. ABŞ alimlərinin apardığı yeni araşdırma göstərir ki, bu təsirlər sonradan sağlam qidalanmaya keçidlə belə tam aradan qalxmır.
Medianews.az Foodinfo.az-a istinadla xəbər verir ki, tədqiqat nəticələri xüsusilə gənc yaşlarda qeyri-sağlam qidalanmanın beyin inkişafına ciddi təsir etdiyini ortaya qoyur.
Alimlər bildirir ki, fastfud əsaslı rasion yalnız fiziki sağlamlığa deyil, həm də psixoloji vəziyyətə mənfi təsir göstərir. Belə qidalanma depressiya, narahatlıq və digər psixi pozuntuların yaranma riskini artırır. Eyni zamanda, yüksək miqdarda rafinə olunmuş karbohidratlarla zəngin səhər yeməkləri insanların sosial cazibədarlığına da mənfi təsir edə bilər.
University of Southern California tədqiqatçıları tərəfindən aparılan eksperimentdə gənc yaşlarında yağlı və şəkərli qidalarla qidalanan laboratoriya heyvanlarında yaddaş problemlərinin uzun müddət davam etdiyi müşahidə olunub. Araşdırma zamanı bu heyvanlarda yaddaş və öyrənmə ilə əlaqəli olan asetilxolin səviyyəsinin aşağı düşdüyü müəyyən edilib.
Təcrübə çərçivəsində heyvanlara müxtəlif obyektlər təqdim olunub və bir neçə gün sonra eyni mühitdə yeni obyekt əlavə edilərək yaddaş testləri aparılıb. Nəticədə qeyri-sağlam qidalanan heyvanların əvvəl gördüklərini xatırlaya bilmədiyi, nəzarət qrupunun isə obyektləri asanlıqla tanıdığı üzə çıxıb.
Mütəxəssislər vurğulayır ki, yeniyetməlik dövründə düzgün qidalanma beyin inkişafı üçün kritik əhəmiyyət daşıyır. Bu mərhələdə yaranan yaddaş problemləri sonrakı illərdə daha çətin bərpa olunur və bəzi hallarda tibbi müdaxilə olmadan tam aradan qaldırılması mümkün olmur.