11 yaşlı braziliyalı futbolçu Bernardo Lopes “Botafoqo” akademiyasının yeni üzvüdür.
Medianews.az Publika.az-a istinadən xəbər verir ki, onun hekayəsi qısa zamanda futbol dünyasını duyğulandırıb.
Oğlanın cəmi bir yaşı olanda bədbəxt hadisə baş verib. Təsadüfən üzərinə qaynar su ilə dolu qazan aşıb və nəticədə o, üz nahiyəsindən ciddi yanıq xəsarətləri alıb. Hadisədən sonra Bernardo 7 ay xəstəxanada qalıb və həkimlər onun həyatını xilas etmək üçün mübarizə aparıblar.
Ağır travmanın nəticələrinə baxmayaraq, o, futbolçu olmaq arzusundan imtina etməyib.
İllər sonra Bernardo yeniyetmələr arasında keçirilən turnirdə iştirak edib və onun oyunu “Botafoqo”nun skautlarının diqqətini çəkib. Klub nümayəndələri gənc futbolçunun istedadından o qədər təsirləniblər ki, onu akademiyaya dəvət etmək qərarına gəliblər.
Klubda bildirilib ki, Lopesin hekayəsi inanılmaz xarakter gücünün və insanın öz arzularına inamının parlaq nümunəsidir.
Bernardo artıq rəsmi olaraq “Botafoqo” akademiyasının üzvüdür və peşəkar futbola doğru ilk addımlarını atmağa çalışacaq. Onun hekayəsi sosial şəbəkələrdə minlərlə insanı ilhamlandırır və xatırladır ki, ən ağır sınaqlardan sonra belə arzular gerçəkləşə bilər.
.jpg)
.jpg)