Marketlər alıcıları aldadır? – Qiymət fərqlərinə görə kim cavabdehdir?

Son vaxtlar bəzi böyük marketlərdə məhsulun vitrin qiyməti ilə kassadakı məbləğ arasında fərq yaranması müşahidə olunub. İqtisadiyyat Nazirliyi belə halları araşdıraraq müvafiq cərimələr tətbiq edib. Ekspertlər hesab edirlər ki, bu, istehlakçı hüquqlarının pozulması kimi qiymətləndirilməlidir, sadəcə texniki problem deyil. Belə uyğunsuzluqların qarşısını almaq üçün hansı nəzarət mexanizmləri gücləndirilməlidir? İqtisadçı-ekspert Xalid Kərimli Medianews.az -a açıqlamasında bildirdi ki, şəbəkə marketlərdə kassadakı qiymətlə məhsul üzərindəki etiket qiyməti arasında fərqlərin yaranmasının səbəblərinə aydınlıq gətirib. Onun sözlərinə görə, bu hallar əsasən iri marketlərdə – mərkəzləşdirilmiş satış sistemlərində müşahidə olunur. “Mərkəzi sistemdə qiymət dəyişdirilir, sonra bu informasiya şəbəkəyə bağlı olan yerli mağazalara ötürülür. Bu marketlərin yüzlərlə filialı var. Satıcı isə sadəcə qiyməti çıxarıb, yenisini yapışdırmalıdır. Məncə, bu texniki məsələdir və məqsədyönlü şəkildə alıcını aldatmaq niyyəti daşımır”, – deyə ekspert bildirib. Bununla belə, Xalid Kərimli qeyd edib ki, belə hallarda istehlakçıların hüquqları pozulur və vətəndaşlar bu barədə şikayət etməlidirlər: “İqtisadiyyat Nazirliyi bu hallara görə cərimə tədbirləri tətbiq etməlidir. Amma sahibkarları da həddindən artıq sıxışdırmaq doğru olmaz. Bu məsələyə nəzarət isə İstehlak Bazarına Nəzarət və Antihisar Dövlət Xidmətinin səlahiyyətlərinə daxildir”. Ekspert hesab edir ki, məsələ inzibati xarakter daşıyır və yerindəcə protokol tərtib olunmalıdır: “Bu, həm vətəndaşların hüquqlarının qorunmasına, həm də məsul şəxslərin cəzalandırılması ilə gələcəkdə bu cür halların qarşısının alınmasına kömək edəcək”. Oğuz Ayvaz, Medianews.az