ABŞ-da fəaliyyət göstərən Blue Origin şirkəti orbital raketlərin yenidən istifadə texnologiyalarını sınaqdan keçirmək məqsədilə New Glenn raketinin növbəti buraxılış missiyasını elan edib. Bu, raketin istismara verilməsindən sonra üçüncü uçuşu olacaq.
Qatar News Agency-i məlumat verir ki, raketin ABŞ-ın Florida ştatında yerləşən Cape Canaveral Space Force Station kosmodromundan buraxılması planlaşdırılır. Bu addım təkrar istifadə oluna bilən raket texnologiyalarının inkişafında əldə olunan irəliləyişi əks etdirir.
Raket aşağı Yer orbitinə BlueBird 7 peykini çıxaracaq. Bu peyk yerüstü qüllələrə ehtiyac olmadan mobil telefonlara birbaşa əlaqə və internet xidmətləri göstərmək üçün nəzərdə tutulub. O, qlobal rabitə əhatəsini genişləndirməyi hədəfləyən peyk şəbəkəsinin bir hissəsidir. Sisteminin yeni nəsil peyklərindən ikinci olan BlueBird 7 kosmosdan birbaşa mobil cihazlara siqnal ötürmə imkanını gücləndirmək üçün böyük antena ilə təchiz olunub.
Blue Origin kosmik buraxılış imkanlarını inkişaf etdirən və raketlərin təkrar istifadəsi üzərində çalışan şirkətlərdən biridir. Bu istiqamət gələcək kosmik missiyaların dəstəklənməsinə, o cümlədən NASA-nın insanları yenidən Aya göndərməyi hədəfləyən Artemis proqramı ilə bağlı layihələrə xidmət edir./APA