Amerikalı pop ulduz Teylor Svift süni intellekt və “deepfake” texnologiyalarının yaratdığı saxta səs və görüntülərə qarşı müdafiə məqsədilə səsini və xarici görünüşünü markalaşdırmaq üçün hüquqi addım atıb.
Medianews.az-ın məlumatına görə, müğənni ABŞ Patent və Ticarət Nişanları İdarəsinə müraciət edərək səs yazıları və vizual obrazlarının qeydiyyatını istəyib.
Məqsəd onun adından istifadə edilərək hazırlanan saxta reklamlar, mahnılar və manipulyativ məzmunların qarşısını almaqdır.
Müraciətə iki səs klipi və bir səhnə görüntüsü daxildir. Kliplərdə onun yeni albomu ilə bağlı təqdimat və yayımlanma məlumatları yer alır. Vizual materialda isə Svift səhnədə parlaq geyimdə və gitarla təsvir olunur.
Hüquqşünaslar bu addımı süni intellektin məşhurların səsini və görünüşünü təqlid etməsinə qarşı yeni hüquqi yanaşma kimi qiymətləndirirlər. Qeyd olunur ki, belə qeydiyyatlar gələcəkdə manipulyasiya olunmuş kontentlərə qarşı hüquqi müdafiəni gücləndirə bilər.
Ekspertlər bildirirlər ki, mövcud müəllif hüquqları bütün hallarda kifayət etmir, çünki süni intellekt mövcud materialı kopyalamadan yeni oxşar məzmun yarada bilir. Bu da hüquqi boşluq yaradır.
Qeyd edilir ki, oxşar təşəbbüslər digər məşhurlar tərəfindən də dəstəklənir və süni intellektlə bağlı hüquqi qaydaların yenilənməsi müzakirə olunur.
Medianews.az