Peskovdan Tramp və Zelenski şərhi: "Kiyev danışıqlar prosesini tormozlayır"

Rusiya Prezidentinin mətbuat katibi Dmitri Peskov bu gün keçirdiyi brifinqdə Ukrayna münaqişəsi, İran liderinin sağlamlıq vəziyyəti, Rusiya-Kuba münasibətləri və builki "Oskar" qalibləri ilə bağlı bir sıra strateji bəyanatlar səsləndirib.

Medianews.az Musavat.com-a istinadən xəbər verir ki, Peskovun sözlərinə görə, ABŞ Prezidenti Donald Trampın son çıxışları Kiyevin sülh prosesini ləngitdiyini açıq şəkildə ortaya qoyur; Kreml rəsmisi vurğulayıb ki, Trampın Zelenskiyə sövdələşməyə getməyi israrla tövsiyə etməsi göstərir ki, hazırda danışıqların önündəki əsas maneə məhz Ukrayna tərəfidir.

Peskov Kiyevin bir çox hərəkətlərinin məntiqi izahının olmadığını və Ukrayna rəhbərliyinin sülh yolunu açmaq əvəzinə faydasız müqaviməti davam etdirdiyini bildirərək qeyd edib ki, Rusiya sülh prosesinə açıqdır, növbəti danışıqlar raundunun yeri və vaxtı hələ razılaşdırılmasa da, bu, yaxın perspektivdə mümkün ola bilər. Brifinq zamanı İranın yeni Ali Rəhbərinin gizli şəkildə Moskvaya müalicəyə gətirilməsi barədə Küveyt mətbuatında yayılan iddialara toxunan Peskov bu xəbərləri şərh etməkdən imtina edib, lakin qlobal bazarda neft qiymətlərinin artması və ABŞ-ın bəzi sanksiyaları müvəqqəti yumşaltması fonunda Rusiya büdcəsinə əlavə gəlirlərin daxil olacağını proqnozlaşdırıb.

Kuba ilə münasibətlərə də toxunan Kreml sözçüsü Havanın ABŞ-ın "boğucu" embarqosu ilə üz-üzə qaldığını və Rusiyanın bu ölkəyə hər cür mümkün yardımı göstərmək üçün ekspertlər səviyyəsində iş apardığını diqqətə çatdırıb.

Peskov həmçinin bu günlərdə "Ən yaxşı sənədli film" nominasiyasında "Oskar" mükafatı qazanan və Rusiyadakı məktəb təbliğatından bəhs edən "Cənab Heç kim Putinə qarşı" (Mr. Nobody Against Putin) ekran əsərinə baxmadığını və bu səbəbdən geniş şərh verməyəcəyini vurğulayıb.