Paytaxt Bakıda mikromobillik vasitələrindən, xüsusilə skuterlərdən istifadə son dövrlərdə xeyli artıb. Bu tendensiya şəhərdə nəqliyyat sıxlığının azaldılması və alternativ hərəkət vasitələrinin təşviqi baxımından müsbət qiymətləndirilsə də, bəzi hallarda qayda pozuntuları ciddi problemlər yaradır.
Medianews.az bildirir ki, skuter və digər fərdi elektrik nəqliyyat vasitələrindən istifadə edənlərin bir qismi yol hərəkəti qaydalarına riayət etmir. Xüsusilə piyadalar üçün nəzərdə tutulmuş səkilərdə sürətli hərəkət, işıqfor qaydalarının pozulması və qoruyucu vasitələrdən istifadə edilməməsi təhlükəsizlik risklərini artırır. Bəzi hallarda isə sürücülər skuterləri birbaşa piyadaların üzərinə sürərək onların həyat və sağlamlığı üçün real təhlükə yaradır.
Bu cür hallar həm istifadəçilərin öz həyatı üçün risk yaradır, həm də digər hərəkət iştirakçıları, piyadalar və sürücülər arasında haqlı narazılığa səbəb olur. Onların fikrincə, mikromobillik vasitələrinin geniş yayılması ilə paralel olaraq, istifadə qaydaları da daha ciddi şəkildə tənzimlənməlidir.
Mütəxəssislər hesab edir ki, problemin həlli üçün maarifləndirmə tədbirləri gücləndirilməli, sürücülər üçün qaydalar daha aydın şəkildə izah olunmalı və nəzarət mexanizmləri sərtləşdirilməlidir. Eyni zamanda, şəhər infrastrukturunda bu nəqliyyat vasitələri üçün xüsusi zolaqların yaradılması da vacib hesab olunur.
Qeyd olunur ki, düzgün tənzimləmə və məsuliyyətli istifadə olduğu təqdirdə, skuterlər şəhər nəqliyyatının ayrılmaz və təhlükəsiz bir hissəsinə çevrilə bilər.