Kiyev Yaxın Şərq ölkələrinə İranın kamikadze dronlarından müdafiə olunmaları üçün göstərdiyi yardımın müqabilində pul və texnologiya istəyir.
Medianews.az-ın məlumatına görə, bunu jurnalistlərə Ukrayna prezidenti Volodimir Zelenski deyib.
O bildirib ki, Ukrayna artıq regionun dörd ölkəsinə mütəxəssislər göndərib: “Onlar vəziyyəti yerində qiymətləndirə, eləcə də pilotsuz uçuş aparatlarına qarşı müdafiə sistemlərinin necə işləməli olduğunu nümayiş etdirə bilirlər”.
Zelenski vurğulayıb ki, Kiyev bu əməkdaşlığı sadəcə hərbi yardım kimi deyil, qarşılıqlı faydaya əsaslanan tərəfdaşlıq kimi görür. Onun sözlərinə görə, region ölkələri Ukraynanın müharibə şəraitində əldə etdiyi təcrübədən yararlana bilər.
Ukrayna müharibə dövründə, xüsusilə də İran istehsalı olan kamikadze dronlarının hücumları ilə üzləşdikdən sonra pilotsuz aparatlara qarşı müdafiə sahəsində geniş təcrübə toplayıb. Rəsmi Kiyev hesab edir ki, bu təcrübə Yaxın Şərq ölkələrinin də müdafiə qabiliyyətini gücləndirməyə kömək edə bilər.
Zelenskinin dediyinə görə, Ukraynanın təqdim etdiyi ekspert dəstəyi həm texniki qiymətləndirməni, həm də müdafiə sistemlərinin qurulması və istifadə qaydalarının izahını əhatə edir. Bu əməkdaşlıq çərçivəsində Kiyev qarşı tərəfdən maliyyə və texnoloji əməkdaşlıq gözləyir.