“Ümid edirik ki, Rusiya qısa müddətdə Ermənistanın Azərbaycan və Türkiyə ilə sərhədlərindəki dəmir yolu hissələrini bərpa edə biləcək”.
Qafqazinfo xəbər verir ki, bu barədə Ermənistanın Baş naziri Nikol Paşinyan Sankt-Peterburqda Rusiya Prezidenti Vladimir Putinlə keçirdiyi görüşünün nəticələrini şərh edərkən bildirib.
“Hesab edirik ki, hazırkı mərhələdə Tavuş bölgəsində, ən azı İcevan stansiyasınadək təmir işlərinin aparılması vacibdir. Həmçinin Axurik bölgəsindəki hissə - Türkiyə sərhədindən mövcud dəmir yolu xəttinə qədər bərpa edilməlidir. Eyni zamanda, Ermənistan-Azərbaycan sərhədindən Yerasxa qədər olan hissə də. Ümid edirik ki, rusiyalı tərəfdaşlarımız bu işləri maksimum tez yerinə yetirəcəklər”, - Paşinyan deyib.
O, bütün bu hissələrin Rusiyanın konsessiya idarəçiliyində olduğuna diqqət çəkib.
Baş nazirin sözlərinə görə, əgər Rusiya tərəfi hər hansı problemlə üzləşərsə, Ermənistan hökuməti bu hissələri konsessiyadan geri almağa və dövlət büdcəsi hesabına təmir etməyə hazırdır.
Xatırladaq ki, daha əvvəl Paşinyan “Cənubi Qafqaz Dəmir Yolu” (Rusiya Dəmir Yollarının törəmə müəssisəsi) şirkətinə Türkiyə və Azərbaycan istiqamətində sərhədyanı dəmir yolu hissələrinin təcili bərpa edilməsi ilə bağlı tapşırıq verildiyini bildirmişdi.
