Vaşinqtonda ABŞ prezidenti Donald Trampın da iştirak etdiyi Ağ Ev Müxbirləri Assosiasiyasının şam yeməyində silahlı insident törətmiş Koul Tomas Allen kimdir?
Medianews.az ABŞ mediasına istinadla bildirir ki, Allenin 31 yaşı var. Onun Kaliforniya ştatının Torrans şəhərində yaşadığı və yüksək təhsilli bir şəxs olduğu vurğulanır.
Koul Tomas Allen Kaliforniyada universitetdə mexanika mühəndisliyi üzrə bakalavr təhsili alıb, daha sonra isə kompüter elmləri üzrə magistr dərəcəsi qazanıb. Allenin akademik göstəricilərinin yüksək olduğu, müəllimləri tərəfindən intizamlı və çalışqan tələbə kimi xatırlandığı bildirilir.
Allen repetitor və müəllim kimi çalışıb, eyni zamanda proqramlaşdırma və texnologiya sahəsində fəaliyyət göstərib. O, bir neçə il “C2 Education” adlı təhsil şirkətində işləyib və tələbələrin ali məktəblərə hazırlığı ilə məşğul olub.
Sosial şəbəkələrdə yayılan məlumatlara görə, Allen həm də həvəskar video oyun tərtibatçısı olub, “Steam” platforması üçün molekulyar kimya mövzusunda oyun hazırlayıb və yeni layihələr üzərində çalışıb.
Allenin 2026-cı il aprelin 25-də Vaşinqtonda törətdiyi silahlı insidentə gəlincə, məlumatlara görə, Allen tədbirin keçirildiyi hotelin təhlükəsizlik zonasına daxil olmağa cəhd edib, onun üzərində ov tüfəngi, tapança və bıçaqlar olub.
Təhlükəsizlik postunu keçmək istəyərkən atəş açıb, lakin ABŞ Məxfi Xidməti əməkdaşlarının dərhal müdaxiləsi nəticəsində yaxalanıb.
Atışma zamanı bir təhlükəsizlik əməkdaşı yaralanıb, gülləkeçirməz jilet onun həyatını xilas edib.
Tədbirdə iştirak edən yüksək səviyyəli şəxslər, o cümlədən ABŞ prezidenti Donald Tramp təhlükəsizlik məqsədilə ərazidən uzaqlaşdırılıb.
Hazırda hüquq-mühafizə orqanları Allenin bu addımı hansı motivlə atdığını araşdırır. Rəsmi qurumlar hələlik konkret səbəb açıqlamasa da, ilkin ehtimallar onun tək hərəkət etdiyini göstərir. Eyni zamanda onun əvvəlcədən plan qurub-qurmadığı, hər hansı təşkilatla əlaqəsinin olub-olmadığı və psixoloji vəziyyəti istintaqın əsas istiqamətləri kimi nəzərdən keçirilir. Ona qarşı silahdan istifadə və hücum maddələri ilə bağlı ittihamlar irəli sürülüb və istintaq davam etdikcə bu ittihamların genişləndiriləcəyi gözlənilir.
Koul Tomas Allenin həyat yolu ilə ona qarşı irəli sürülən ittihamlar arasındakı kəskin ziddiyyət bu hadisəni daha da diqqət mərkəzinə gətirir. Təhsilli, texniki sahədə çalışan və ictimaiyyətə geniş tanış olmayan bir şəxsin belə bir insidentdə adı hallanması ABŞ-da təhlükəsizlik, radikallaşma və fərdi zorakılıq riskləri ilə bağlı müzakirələri yenidən gündəmə çıxarıb. Hadisənin bütün detalları və motivləri isə yalnız istintaq yekunlaşdıqdan sonra tam aydın olacaq.