Qəhvə sevənlərin çoxu bu içkini gün ərzində fasiləsiz qəbul edir, lakin mütəxəssislər bildirir ki, bu vərdiş yuxu keyfiyyətinə ciddi təsir göstərə bilər.
Medianews.az Foodinfo.az-a istinadla xəbər verir ki, dietoloq Sofiya Kovanova son qəhvə fincanının yatmazdan ən azı 6 saat əvvəl içilməsini tövsiyə edir. Onun sözlərinə görə, kofeinin təsiri orqanizmdə uzun müddət – bəzən 8 saata qədər davam edir və bu da yuxuya getməyi çətinləşdirə bilər.
Mütəxəssis qeyd edir ki, xüsusilə kofeinə həssas olan insanlarda günorta saatlarında içilən qəhvə belə gecə yuxusunun dərinliyini poza, narahatlıq yarada və ürək döyüntüsünü artıra bilər. Bu səbəbdən belə şəxslərə axşam saatlarında qəhvə əvəzinə bitki çaylarına üstünlük vermək tövsiyə olunur.
Bununla yanaşı, sağlam insanlarda qəhvənin normada qəbulu təhlükəli hesab olunmur və hətta diqqətin artmasına kömək edə bilər. Lakin gündəlik 300–400 ml-dən artıq qəhvə istehlakı əks təsir göstərərək narahatlıq və gərginliyi artıra bilər. Buna görə balansı qorumaq və düzgün vaxt seçimi sağlam yuxunun əsas şərtlərindən biri hesab olunur.