Antalyanın Döşemealtı rayonunda baş verən ağır avtobus qəzasında həyatını itirən 10 nəfər doğma şəhərlərində göz yaşları içində dəfn olunub.
Medianews.az xəbər verir ki, faciə ilə bağlı yeni təfərrüatlar ortaya çıxıb.
Məlumata görə, fevralın 1-də Buzlu Turizm şirkətinə məxsus sərnişin avtobusu döngəni keçə bilməyərək xəndəyə aşıb. Qəza nəticəsində 10 nəfər ölüb, 24 nəfər isə müxtəlif dərəcəli xəsarətlər alıb.
Qəzada həyatını itirənlərdən biri, Manavgat rayonundakı bir turist otelində əyləncə meneceri işləyən Aslı Çevik olub. Məlum olub ki, Çevik ailəsini ziyarət etmək üçün şəhərə gəlib və Antalyaya qayıtmaq üçün əvvəlcədən avtobus bileti alıb. Lakin həmin gün səfəri qaçırdığı üçün ertəsi günə bilet alaraq sonradan qəzaya uğrayan avtobusa minib.
Aslı Çevikin cənazəsi yarılma prosedurlarından sonra doğma şəhəri Əskişəhərə gətirilib. Tepebaşı rayonunun Şəkər məhəlləsində yerləşən Ömər Ağa məscidində qılınan cənazə namazından sonra Çevik Əsri qəbiristanlığında dəfn olunub. Mərasimdə ailə üzvləri və dostları göz yaşlarını saxlaya bilməyiblər.
Qəzada həyatını itirən digər Əskişəhər sakini, 62 yaşlı Resmiye Göktepe üçün isə 100-cü İl məscidində vida mərasimi keçirilib. O da yaxınlarının iştirakı ilə Əsri qəbiristanlığında torpağa tapşırılıb.
Hadisə ilə bağlı hüquq-mühafizə orqanları tərəfindən araşdırma aparıldığı, avtobusun qəza anındakı texniki vəziyyəti və yol şəraitinin qiymətləndirildiyi bildirilir.
Medianews.az
