Zülal baxımından zəngin hesab olunan qidalar sırasında yumurta hər zaman ön sıralarda göstərilsə də, əslində onu geridə qoyan məhsullar da var.
Medianews.az xarici mediaya istinadən xəbər verir ki, qida dəyəri yüksək olan kinoa həm zülal baxımından yumurtanı üstələyir, həm də orqanizm üçün vacib vitamin və minerallarla zəngindir.
Mütəxəssislərin sözlərinə görə, bir ədəd yumurtada təxminən 6 qram zülal olduğu halda, bişirilmiş kinoa porsiyasında 8 qram zülal mövcuddur. Bu xüsusiyyət onu xüsusilə sağlam qidalanmağa üstünlük verənlər üçün cəlbedici edir.
Kinoa yalnız zülalla deyil, həm də fol turşusu, maqnezium və B qrupu vitaminləri ilə zəngindir. Bundan əlavə, bir porsiyada təxminən 5 qram lif olması bağırsaq sağlamlığını qorumaq istəyənlər üçün mühüm üstünlük hesab edilir.
Vegetarian qidalanan insanlar üçün isə kinoa əvəzolunmaz zülal mənbələrindən biri sayılır.
Bu yarmanı hazırlamaq da çətin deyil. Əsas məsələ su və kinoa nisbətini düzgün seçməkdir. Düzgün bişirildikdə kinoa yumşaq və dənəvər olur, kuskus kimi müxtəlif ədviyyatlar və göyərtilərlə yaxşı uyğunlaşır.
Kinoanın neytral dadı onu müxtəlif yeməklərə əlavə etməyə imkan verir. Bu məhsul salatlarda, tərəvəz yeməklərində, hətta bəzi xəmir məmulatlarında istifadə edilə bilər və yeməyin zülal dəyərini artırır.
Qidalanma ilə bağlı digər araşdırmalarda həkimlər bağırsaq sağlamlığını yaxşılaşdırmaq üçün istehlakı tövsiyə olunan 6 növ yarmanı da açıqlayıblar. Onların fikrincə, bu məhsulların gündəlik rasiona daxil edilməsi həzm sisteminə ciddi fayda verir.
Bundan başqa, dietoloqlar bağırsaqlar üçün ən faydalı qoz növünün makadamiya qozu olduğunu bildiriblər. Mütəxəssislər qeyd edirlər ki, makadamiya qozu qida maddələri ilə zəngindir və sağlam qidalanma menyusunda yer almağa layiqdir.