Omikronun alt növü olan BA.3.2 qısa müddətdə ABŞ-nin 29 ştatına və Puerto Rikoya yayılıb.
Medianews.az xəbər verir ki, çoxsaylı mutasiyalar daşıyan bu variant diqqət mərkəzində olsa da, mütəxəssislər hazırkı vəziyyətin təhlükəli olmadığını bildirir.
Xəstəliklərə Nəzarət və Profilaktika Mərkəzləri (CDC) ölkə üzrə yayılmanın artdığını təsdiqləyib. Bununla belə, alimlər yeni dalğa riskinin hələlik yüksək olmadığını vurğulayır.
Stenford Universitetindən infeksionist Ceyk Skott bildirib ki, vəziyyət ciddi nəzarət tələb edir. Ümumdünya Səhiyyə Təşkilatı da BA.3.2-ni izlənən variantlar siyahısına daxil edib.
Mövcud məlumatlara görə, variantın yayılma üstünlüyü və ya xəstəliyin ağırlığını artırması müşahidə olunmur. Lissabon Universitetindən immunoloq Mark Veldhoen qeyd edir ki, bu variant əsasən Omikronla eyni xüsusiyyətlərə malikdir.
Alimlər vaksinlərin təsirli qaldığını, immun yaddaşın isə ağır xəstəlik riskini azaltdığını bildirir. BA.3.2 hazırda diqqətlə izlənən, lakin gündəlik həyatda ciddi dəyişiklik tələb etməyən variant kimi qiymətləndirilir.
Medianews.az