Bir qadının illər sonra orta məktəb riyaziyyat müəlliminə göndərdiyi mesaj sosial mediada geniş rezonans doğurub. Qadın müəlliminin vaxtilə ona dediyi “Sən heç vaxt heç nəyə nail olmayacaqsan” sözlərini unutmadığını bildirib.
Medianews.az xarici mediaya istinadən xəbər verir ki, qadın sosial media hesabında paylaşdığı mesajda məktəb illərində müəlliminin onu riyaziyyatı zəif bildiyi üçün tez-tez alçaltdığını və hətta məktəbdən uzaqlaşdırdığını iddia edib.
O bildirib ki, həmin sözlər uzun illər onun psixologiyasına təsir edib və özünü qeyri-kafi hiss etməsinə səbəb olub.
İllər sonra müəllimi ilə əlaqə saxlayan qadın artıq özü də müəllim olduğunu qeyd edib və diqqət çəkən ifadələr işlədib.
“Müəllim, illər əvvəl mənə heç nəyə nail olmayacağımı demişdin. Bu sözlər uzun müddət beynimdə əks-səda verdi. Bu gün mən müəlliməm və sizə təşəkkür etmək istəyirəm. Sayənizdə şagirdlə necə davranmamağı öyrəndim”, – deyə o mesajında yazıb.
Qadının paylaşımı qısa müddətdə sosial şəbəkələrdə geniş yayılıb. İstifadəçilər müəllimlərin şagirdlərin həyatına və psixologiyasına təsiri ilə bağlı müxtəlif fikirlər səsləndiriblər.
Bir çox sosial media istifadəçisi müəllimlərin istifadə etdiyi sözlərin uşaqların gələcəyinə ciddi təsir göstərə biləcəyini vurğulayıb.
Medianews.az
