Şimali Koreya lideri Kim Çen In ölkənin dəniz qüvvələrinin gücləndirilməsi məqsədilə yeni 10 min tonluq esmineslərin inşasına göstəriş verib. Pxenyan eyni zamanda nüvə daşıma qabiliyyətinə malik dəniz sistemlərinin yaradılması istiqamətində işləri sürətləndirdiyini açıqlayıb.
Medianews.az xarici KİV-ə istinadən xəbər verir ki, dövlət mediasının yaydığı məlumata görə, yeni esmineslər Şimali Koreyanın indiyədək hazırladığı ən böyük döyüş platformalarından biri olacaq.
Kim Çen In bildirib ki, ölkə mümkün nüvə təhdidlərinə qarşı öz dəniz gücünü daha da artırmalıdır. O, quruda, havada və dənizdə hərbi imkanların genişləndirilməsinin vacibliyini vurğulayıb.
Məlumata görə, Şimali Koreya son dövrlərdə nüvə raketləri daşıya bilən döyüş gəmiləri və digər dəniz sistemlərinin hazırlanması istiqamətində fəaliyyətini intensivləşdirib.
Bundan əlavə, Kim Çen In hazırda inşa edilən 5 min tonluq esmineslərin də qısa müddətdə istismara verilməsini tələb edib. O, qarşıdakı illərdə daha böyük və daha müasir döyüş gəmilərinin tikintisini nəzərdə tutan genişmiqyaslı planın hazırlandığını da açıqlayıb.
Hərbi ekspertlərin fikrincə, Pxenyanın bu addımı həm ölkənin hərbi potensialını artırmağa, həm də regionda çəkindirmə imkanlarını gücləndirməyə hesablanıb.
Medianews.az